ថ្ងៃទី០១ ខែតុលា កាលពី ៧០ឆ្នាំមុន លោក ម៉ៅ សេទុង បានប្រកាសជាឯកច្ឆន្ទបង្កើតសាធារណរដ្ឋប្រជាមានិតចិន បន្ទាប់ពីដែនដីដ៏ធំនៃអាស៊ីបូពា៌រងការញាំញីដោយសង្គ្រាម រយៈពេលជាង ៤ទសវត្ស។ ជាសង្គ្រាមដែលផ្ទុះឡើងក្រោយពីបដិវត្តន៍ឆ្នាំ ១៩១១ ក្នុងការផ្ដួលរំលំរបបរាជានិយម ដែលមានវត្តមានជាង ៥.០០០ឆ្នាំ ។
ក្រោយបដិវត្តន៍ ឆ្នាំ ១៩១១ ចិនបានក្លាយជាសាធារណរដ្ឋ ប៉ុន្តែតាមតំបន់នីមួយៗមានស្ដេចត្រាញ់ (War Lords) ជាអ្នកកាន់កាប់។ ជាមួយនោះដែរ មានបក្សធំៗពីរ គឺបក្ស គួកមីនតាំង ( KMT ឬបក្សជាតិនិយម) និងបក្សកុំមុយនិសចិន (CPC)។ បក្សទាំងពីរនេះ បានចងសម្ពន្ធភាពជាមួយគ្នានៅពេលដំបូង លុះនៅឆ្នាំ ១៩២៧ សម្ពន្ធភាពបានផ្ដាច់ ហើយសង្គ្រាមស៊ីវិលក៏ចាប់ផ្ដើម។
សង្គ្រាមរវាងចលនាទាំងពីរបានរីករាលដាលចំនួន ១០ឆ្នាំ បានផ្អាក ហើយចាប់ដៃគ្នាដើម្បីប្រឆាំងនឹងជប៉ុនដែលចូលឈ្លានពាននៅឆ្នាំ ១៩៣៧ ។ នៅពេលជប៉ុនចាញ់ សង្គ្រាម ស៊ីវិលនៅចិនដីគោកក៏បានបន្តរហូតដល់ឆ្នាំ ១៩៤៩។
ចលនាកុំមុយនិសចិនបានកាន់កាប់ចិនដីគោកទាំងមូល លើកលែងតែ ម៉ាកាវ (ស្ថិងក្រោមអាណានិគមព័រទុយហ្កាល់រហូតដល់ឆ្នាំ ១៩៩៩) និងហុងកុង (ស្ថិតក្រោមអាណានិគមអង់គ្លេសរហូតដល់ឆ្នាំ ១៩៩៧) ខណៈបក្សគួកមីនតាំងភៀសទៅកាន់កោះតៃវ៉ាន់។ ពេលនោះ សាធារណរដ្ឋប្រជាមានិតចិនក៏បានកើតឡើង នៅចិនដីគោក ក្នុងឆ្នាំ ១៩៤៩។
