ទឹកធ្លាក់ វាលពួច ជារមនីយដ្ឋានធម្មជាតិមួយកន្លែងស្ថិតនៅក្នុង ភូមិទ្វីខាងជើង ឃុំអណ្ដូងខ្មែរ ស្រុកកំពត ខេត្ដកំពត មានកម្ពស់ប្រមាណជា ២០ ម៉ែត្រ និងមុខកាត់ជាងមួយម៉ែត្រនារដូវប្រាំង។ ទឹកធ្លាក់ល្បាក់ទីពីរហូរធ្លាក់លើថ្លុកទឹកប្រមាណជា ៥ គុណ ១០ ម៉ែត្រ សមល្មមសម្រាប់ការងូតទឹកលេងកម្សាន្ដ។ នៅទីនោះមានថ្មតូចធំពង្រាយខ្លួនរាយប៉ាយតាមខ្នងភ្នំរហូតដល់បាតជ្រោះ។ ធ្វើដំណើរចុះ និងឡើងចម្ងាយប្រហែលជា ៣០០ ម៉ែត្រពីទឹកធ្លាក់ទីពីរ នឹងជួបទឹកធ្លាក់កម្ពស់ ៥០ ម៉ែត្រ ប៉ុនមួយទុយោធំធ្លាក់លើថ្ម គ្មានថ្លុកទឹកទ្រ។
យើងត្រូវធ្វើដំណើរចូលតាមច្រកវត្ដព្រះពុទ្ធជ័យមង្គលារាម ហៅ វាលពួច ដោយឆ្លងកាត់ផ្នូរខ្មោចចោរ ចម្ងាយប្រមាណជាង ១ គីឡូម៉ែត្រពីរង្វង់មូលរលកនៃក្រុងកំពត ។ ជាអារាមមួយដែលសម្បូររូបចម្លាក់សត្វនៃឆ្នាំទាំង ១២ រូបលោកយាយសំពៅ៥ និងរូបលោកតាឥសី ព្រមទាំងព្រះវិហារថ្មីសន្លាងសង់ពីដែក និង ស័ង្កសី ។
ធ្វើដំណើរពីវត្តឆ្ពោះទៅកាន់ភ្នំប្រមាណ ១ គីឡូម៉ែត្រ មានផ្ទះមួយខ្នងជាអាហារដ្ឋាននៅកណ្ដាលផ្លូវឡើងទៅទីឋានទឹកធ្លាក់ ។
