រហាត់ទឹកធ្វើពីឈើដ៏ធំមួយដែលមានប្រវត្តិតាំងពីទសវត្ស៦០ និងជាអត្តសញ្ញាណមួយរបស់ខេត្តសៀមរាប មានទីតាំងស្ថិតក្នុងទីតាំងបណ្តុះកូនឈើប្រាសាទតាកែវក្នុងឧទ្យានអង្គរ
នឹងត្រូវរៀបចំពិធីក្រុងពលីជួសជុលឡើងវិញនៅថ្ងៃទី១៥ ខែកញ្ញា
ឆ្នាំ២០១៩ ខាងមុខ។
បច្ចុប្បន្ន រហាត់ទឹកនេះសល់តែរូបរាង ដែលមានសភាពពុកផុយ និងខូចខាតធ្ងន់ធ្ងរមិនអាចដំណើរការបាន។ ឃើញតម្លៃដ៏មានសារសំខាន់ ក្នុងការថែរក្សាអត្តសញ្ញាណរបស់ខេត្តសៀម
រាប
ក៏ដូចជាការផ្តល់នូវតួនាទីដល់រហាត់ទឹកនេះឡើងវិញ
អាជ្ញាធរជាតិអប្សរា តាមរយៈព្រះតេជគុណ ព្រះសទ្ធម្មប្បកាសនី បណ្ឌិត
តាត មហាទី ព្រះចៅអធិការវត្តព្រះឥន្ទកោសា
បានទទួលជំនួយសប្បុរសពីលោកស្រីឧកញ៉ា សៀង ចាន់ហេង
អគ្គនាយិកាក្រុមហ៊ុនហេងអភិវឌ្ឍន៍
នូវទឹកប្រាក់ចំនួន៩ម៉ឺនដុល្លារអាមេរិកដើម្បីជួសជុលរហាត់ទឹកនេះឡើងវិញ។
ការជួសជុលនឹងធ្វើឡើងតាមបច្ចេកទេសទំនើប
ប៉ុន្តែរក្សានូវរចនាបទបុរាណ ដែលជាកេរមរតកដូនតា
និងរក្សាបានទាំងស្រុងនូវរូបភាពដើមរបស់រហាត់។
ក្រៅតែពីការជួសជុលរហាត់ អាជ្ញាធរជាតិអប្សរាក៏នឹងរៀបចំច្រាំង
និងសួនច្បារអមសងខាងជណ្តើរដើម្បីបន្ថែមសោភ័ណភាពស្រស់បំព្រង អាចឱ្យភ្ញៀវទេសចរជាតិ និងអន្តរជាតិ
ចូលទស្សនាបានស្គាល់ និងបានដឹងច្បាស់ពីគុណតម្លៃវប្បធម៌ជាតិខ្មែរ។
