ម្ដុំភ្នំ១០០៥ ឬ១៥០០
ចេញពីខេត្តពោធិ៍សាត់តាមបណ្ដោយផ្លូវជាតិលេខ៥៥ គេនឹងបានទៅដល់រង្វង់មូលប្រមោយ ដែលជាទីរួមស្រុកវាលវែង។
1/ បើបត់ស្ដាំ ទៅឃុំក្រពើពីរ
2/ បើបត់ឆ្វេង ទៅឃុំអូរសោម ទីនោះក្រៅពីតំបន់ទេសចរណ៍ធម្មជាតិមានសត្វក្រពើភ្នំ
3/ បើទៅត្រង់ ចេញពីរង្វង់មូលប្រមោយប្រមាណ ៣០គីឡូម៉ែត្រ នឹងបានឆ្លងកាត់ផ្លូវបត់បែន លូនឡើងលើភ្នំរាងដូចអន្ទង់អាំង «ផ្លូវបុប្ផាលាក់ខ្លួន» ដោយសារតែត្រូវឆ្លងកាត់តំបន់ភ្នំ ១៥០០ ឬ១០០៥ ដើម្បីទម្លុះឱ្យដល់ឃុំថ្មដា ។ នៅចន្លោះតំបន់ភ្នំ១៥០០ និងតំបន់ថ្មដា មានទេសភាពព្រៃភ្នំ វាលស្មៅលើខ្នងភ្នំ ទឹកអូរហូរតាមជ្រលងភ្នំដ៏ស្រស់ត្រកាល ទស្សនា កាន់តែយូរកាន់តែជក់ចិត្ត។ ទៅមុខបន្តិច នឹងបានទៅដល់រមណីយដ្ឋានទឹកធ្លាក់ថ្មដាតូច ដែលមានទឹកធ្លាក់ដ៏ស្រស់ស្អាត អាចមុជលេងកម្សាន្ត មានម្ហូបអាហារសហគមន៍ ឈ្ងុយឆ្ងាញ់ ។ ចេញពីទឹកធ្លាក់ថ្មដាតូច នឹងបានទៅដល់ស្ទឹងមេទឹក ដែលនៅតាមមាត់ ស្ទឹង និងក្បែរៗតំបន់នេះ មានរមណីយដ្ឋានទេសចរណ៍ពិសេសៗជាច្រើន ដូចជា ផារ៉ា ដាយរីស៊ត តំបន់អភិវឌ្ឍន៍ឡុង វឌ្ឍនា ប្រាក់ សុជាតា អនិកជនខ្មែររស់នៅសហរដ្ឋ អាមេរិក តំបន់អភិវឌ្ឍន៍ អឹមឌីអេស...ដែលមានកន្លែងសម្រាក បោះតង់ មានទឹកអូរហូរ រ៉ឹមៗ មានសេវាកម្មម្ហូបអាហារ និងទីទស្សនាទេសភាពជាច្រើនទៀត។ នៅតាមដងស្ទឹង មេទឹកអាចជិះកាណូត ឬទូកទស្សនាកម្សាន្តនូវសម្រស់ធនធានធម្មជាតិ អមសងខាង ស្ទឹង។ ចេញពីតំបន់ស្ទឹងមេទឹក គឺច្រកថ្មដា ដែលជាច្រកព្រំដែនរវាងកម្ពុជា-ថៃ ពោលគឺ រវាងខេត្តពោធិ៍សាត់ និងខេត្តត្រាត។ អាចឆ្លងទៅលេខខេត្តត្រាតបានដែរ ដែលមានផ្សារ លក់ដូរម្ហូបអាហារ ផ្លែឈើ នំចំណីជាប់មាត់សមុត្រ និងមានរបស់របរមួយចំនួនទៀត។
