ឯកឧត្តម ស្វាយ សំអ៊ាង អភិបាលខេត្តមណ្ឌលគិរី បានចេញលិខិតលេខ០៦៣/១៩ សជណ ចុះថ្ងៃទី២៤ ខែកក្កដា ឆ្នាំ២០១៩ ដកហូតយកដីពីឯកឧត្តម សេង សុវណ្ណារ៉ា មកជាសម្បត្តិរដ្ឋវិញ ។
ថ្ងៃទី១៣ខែសីហាឆ្នាំ២០១៩ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានចេញសេចក្តីសម្រេចលេខ១៤០សសរ. ដកតំណែងលោក សេង សុវណ្ណារ៉ា ចេញពីក្រុមការងារថ្នាក់ជាតិ ចុះជួយខេត្តមណ្ឌលគិរី បន្ទាប់ពីផ្ទុះរឿងរ៉ាវពាក់ព័ន្ធការរំលោភយកដីរដ្ឋប្រមាណ ១ពាន់ហិកតា ស្ថិតនៅភូមិអន្ត្រេះ ឃុំអរបួនលើ ស្រុកកោះញែក ខេត្តមណ្ឌលគិរី។
ថ្ងៃទី២៤ ខែសីហា ឆ្នាំ២០១៩ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា ចេញព្រះរាជក្រឹត្យបញ្ចប់តំណែងលោក សេង សុវណ្ណារ៉ា ពីអនុរដ្ឋលេខាធិការក្រសួងយុត្តិធម៌ តាមសំណើទូលថ្វាយរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
នៅរសៀលថ្ងៃទី២៦មិថុនា នាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ បានកោះអញ្ជើញលោក សេង សុវណ្ណារ៉ា ឲ្យចូលខ្លួនបំភ្លឺនៅនាយកដ្ឋានសន្តិសុខផ្ទៃក្នុង នៃអគ្គស្នងការដ្ឋាននគរបាលជាតិ ហើយត្រូវបានឃាត់ខ្លួនតែម្តង ករណីរំលោភលើដីសាធារណៈរបស់រដ្ឋប្រមាណ១ពាន់ហិកតា នៅខេត្តមណ្ឌលគិរី។
