គម្រោងវិនិយោគអភិវឌ្ឍនៅលើផ្ទៃដីទំហំ ២០៥ហិកតា នៅស្រុក ភ្នំស្រួច និងស្រុក សំរោងទង ក្នុងទឹកដីខេត្តកំពង់ស្ពឺ គឺជាការវិនិយោគដ៏ធំមានរួមទុនចម្រុះជាតិសាសន៍មកពី ៣ប្រទេស ដូចជាប្រទេសចិន ស្វីស និងសិង្ហបុរី ក្រោមឈ្មោះក្រុមហ៊ុន JOE GRAND ECOINVESTMENT (ចូហ្គ្រេន អេកូអ៊ិនវេសម៉ិន ឯ.ក)។
រដ្ឋបាលខេត្តកំពង់ស្ពឺ កំពុងពន្លឿនឲ្យក្រុមហ៊ុនរៀបចំផែនការមេឲ្យបានច្បាស់លាស់ តាមការវាយតម្លៃ និងពិនិត្យឯកភាពលើគម្រោងវិនិយោគសាងសង់មជ្ឈមណ្ឌលសួនកម្សាន្តលំដាប់ពិភពលោក និងធំជាងគេនៅក្នុងតំបន់អាស៊ីនេះ ដែលមានតម្លៃទុនប្រមាណ ៥០០លានដុល្លា ដោយរំពឹងថា នឹងបញ្ចប់រួចរាល់ក្នុងខែមិថុនា ដើម្បីបញ្ជូនបន្តទៅកាន់ក្រុមប្រឹក្សាអភិវឌ្ឍន៍កម្ពុជាធ្វើការអនុម័តជាផ្លូវការ។
គម្រោងវិនិយោគតំបន់ទេសចរណ៍សួនទឹកដ៏ធំពុំធ្លាប់មាននៅកម្ពុជានេះ នឹងមានដូចជា មជ្ឈ មណ្ឌលកម្សាន្តសួនទឹក សួនកសិកម្មទេសចរណ៍ សួនកុមារ សួនសត្វ ផ្ទះលំហែ រមណីយដ្ឋាន និងសណ្ឋាគារ ជាដើម។
ដំណាក់កាលដំបូង ក្រុមហ៊ុននឹងចំណាយទឹកប្រាក់ចំនួន ២០០លានដុល្លារ ដើម្បីអភិវឌ្ឍនៅលើផ្ទៃដីទំហំជាង ១០០ហិកតា ដែលគម្រោងនឹងបញ្ចប់នៅដំណាលគ្នាជាមួយគម្រោងស្ថាបនាផ្លូវល្បឿនលឿនភ្នំពេញ-ព្រះសីហនុ នៅចុងឆ្នាំ ២០២២ខាងមុខនេះ។
បច្ចុប្បន្ន ខេត្តកំពង់ស្ពឺ មានតំបន់ទេសចរណ៍ទាក់ទាញបែបប្រវត្តិសាស្ត្រ ធម្មជាតិ អេកូទេសចរណ៍ និងកែច្នៃ មានដូចជា វត្តវាំងចាស់ ឬទីក្រុងឧដុង្គ រមណីយដ្ឋានអំពែភ្នំ ឧទ្យានជាតិគិរីរម្យ វីគិរីរម្យផាញរីសត (A2A ថោន) ទឹកធ្លាក់ចំបក់ ទឹកធ្លាក់ ៧ជាន់ ឬទឹកធ្លាក់ជ្រាវទេទឹកពុះ ជាដើម។
