នៅរសៀលថ្ងៃទី២៨ ខែមិថុនា ឆ្នាំ២០២០ ចំថ្ងៃខួបលើកទី៦៩ នៃថ្ងៃកំណើតគណបក្សប្រជាជនកម្ពុជា (២៨ មិថុនា ១៩៥១ - ២៨ មិថុនាឆ្នាំ២០២០) ពិធីសូត្រមន្តប្រោសព្រំប្រសិទ្ធពរជ័យដាក់ឱ្យដំណើរការជាផ្លូវការ និងឡើងអគារថ្មីនៃទីស្នាក់ការកណ្តាលគណបក្សប្រជាជនកម្ពុជា បានប្រារព្ធក្រោមការអញ្ជើញចូលរួមពីសម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជា ព្រមទាំងឥស្សរជនជាថ្នាក់ដឹកនាំជាន់ខ្ពស់របស់គណបក្សប្រជាជនកម្ពុជាជាច្រើនរូបផ្សេងទៀត។
អគារទីស្នាក់ការកណ្តាលគណបក្សប្រជាជនកម្ពុជា បានសាងសង់ឡើងកណ្តាលរាជធានីភ្នំពេញប្រកបដោយភាពធំស្កឹមស្កៃ មានកម្ពស់៥ជាន់ជាមួយនឹងក្បូរក្បាច់រចនាបថខ្មែរដ៏ល្អវិចិត្រ និងមានភាពល្អប្រណិត ក្រោមរចនាបថបីរួមចូលគ្នា ហៅថា រចនាបថរួមសម័យ។ រចនាបទទាំង៣នោះមាន ៖ ទី១) រចនាបថប្រាសាទអង្គរវត្ត ទី២) រចនាបថបន្ទាយស្រី និងទី៣) រចនាបថកណ្ដាល។ ពីខាងក្រៅអគារទាំងមូលត្រូវបានរំលេចទៅដោយពណ៌ស ដែលជានិមិត្តរូបនៃភាពស្មោះសបរិសុទ្ធសម្រាប់ជាតិ និងប្រជាជន។ អគារនេះមានបណ្ដោយ១៥០ម៉ែត្រ ទទឹង៧៤ម៉ែត្រ។ កម្ពស់អគារគិតពីទីលានមហាជនខាងមុខរហូតទៅដល់កំពូលពេជ្រមានកម្ពស់ ៤៨ម៉ែត្រ។
អគារនេះមានបន្ទប់រដ្ឋបាល សាលបដិសណ្ឋារកិច្ចដែលមានក្រឡាផ្ទៃប្រមាណ ៣ពាន់ម៉ែត្រ ក្រឡា អាចដាក់មនុស្សបានជាង ៤.០០០នាក់ ការិយាល័យសម្ដេចប្រធានកិត្តិយស ការិយាល័យប្រឹក្សាគណៈអចិន្ត្រៃយ៍ ការិយាល័យសមាជិកអចិន្ត្រៃយ៍ បន្ទប់ប្រជុំគណៈប្រចាំការ បន្ទប់ប្រជុំអន្តរជាតិ បន្ទប់សោតទស្សន៍ បន្ទប់ជនពិការ បន្ទប់សម្រាក អាហារដ្ឋាននៅផ្នែកខាងត្បូងអគារ ដែលអាចដាក់មនុស្សបានចំនួន ១២០នាក់ក្នុងមួយពេល សាលលៀងសាយភោជន៍អាចដាក់មនុស្សបាន១៥០នាក់ និងបន្ទប់រៀបចំអាហារ បន្ទប់ទទួលទានអាហារ ឃ្លាំង បន្ទប់កងការពារ បន្ទប់កាត់សក់។
ជាន់ផ្ទាល់ដីមានចំណតរថយន្តជាង ៥០០ចំណត និងទីធ្លាមុខអគារសម្រាប់មហាជនអាចចតរថយន្តបាន ៣០០គ្រឿង។ នៅជាន់លើ មានសាលប្រជុំជាលក្ខណៈមហាជន ឬមិទ្ទិញអាចដាក់មនុស្សបានចំនួនប្រមាណជា ១ម៉ឺននាក់។ ជាន់ទី៥ មានសាលប្រជុំធំ ដែលអាចដាក់បានប្រមាណ ៣.៤៧៤នាក់ មានទីសម្រាកនៅសងខាងដែលអាចដាក់មនុស្សបាន ៣.៤៧០នាក់ដែរ។
