សម្ដេចព្រះរាជអគ្គមហេសី នរោត្តម មុនីនាថ សីហនុ ប្រសូតនៅថ្ងៃទី ១៨ ខែមិថុនា ឆ្នាំ១៩៣៦ នាទីក្រុងសាយហ្គន ឫហូជីមិញ។ ព្រះនាមដើមរបស់ទ្រង់គឺប៉ូល ម៉ូនិក អ៊ីហ្ស៊ី (Paule Monique Izzi)។ ព្រះមាតាព្រះនាម ប៉ុម ពាង (Pomme Peang) ជាជនជាតិវៀតណាម ក្រោយលែងលះគ្នាជាមួយលោកអ៊ុ ផាន់កែវ បានទៅយកស្វាមីទី២ ឈ្មោះហ្សង់ ហ្វ្រង់ស័រ អ៊ីហ្ស៊ី ជាជនជាតិបារាំង សញ្ញាតិអ៊ីតាលី ដែលជាអ្នកគ្រប់គ្រងធនាគារមួយ ។ក្រោយពីបានជាប្តីប្រពន្ធហើយ លោកហ្សង់ ហ្វ្រង់ស័រ អ៊ីហ្ស៊ី បាននាំអ្នកស្រីប៉ុម ពាង ទៅរស់នៅឯទីក្រុងព្រៃនគរ ដែលនៅទីនោះ អ្នកស្រីប៉ុម ពាង បង្កើតបានកូន២នាក់ទៀត គឺទី១ឈ្មោះ អាន ម៉ារី អ៊ីហ្ស៊ី ( Anne Marie Izzi ) កើតនៅថ្ងៃទី១៥ ខែមិថុនា ឆ្នាំ១៩៣៤ និងទី២ឈ្មោះ ប៉ូល ម៉ូនិក អ៊ីហ្ស៊ី (អ្នកម្នាងម៉ូនិក)។
ក្នុងសង្គ្រាមលោកលើកទី២ ឆ្នាំ១៩៣៩ ពេលកងទ័ពណាហ្ស៊ីអាល្លឺម៉ង់ ចូលឈ្លានពាន ដណ្តើមកាន់កាប់ប្រទេសបារាំង លោកហ្សង់ ហ្វ្រង់ស័រ អ៊ីហ្ស៊ី ដែលត្រូវជាប់កំណែនចូលបម្រើក្នុងជួរកងទ័ពបារាំងនៅឥណ្ឌូចិននោះ ត្រូវបានបញ្ជូនពីទីក្រុងព្រៃនគរជាមួយកងទ័ពកំណែនជាជនជាតិបារាំង ខ្មែរ វៀតណាម និងលាវ ជាច្រើនពាន់នាក់ទៅធ្វើសង្រ្គាមវាយបណ្តេញកងទ័ពអាល្លឺម៉ង់ឲ្យចេញពីប្រទេសបារាំងវិញ ។ ពេលនោះ លោកហ្សង់ ហ្វ្រង់ស័រ អ៊ីហ្ស៊ី មានឋានន្តរសក្តិជាអនុសេនីយ៍ទោ បានបាត់ខ្លួននៅក្នុងសមរភូមិនៅប្រទេសបារាំងតាំងពីឆ្នាំ១៩៤០ រហូតមក។ ឯអ្នកស្រីប៉ុម ពាង ក៏នាំកូនៗទាំង២ វិលត្រលប់មករស់នៅទីក្រុងភ្នំពេញ ជួបជុំកូនៗទាំង៥នាក់ជាមួយស្វាមីទី១ (អ៊ុ ផាន់កែវ) របស់គាត់វិញ។
ព្រះនាងបានរៀបអភិសេកជាមួយព្រះបាទនរោត្តម សីហនុ ក្នុងខែមេសា ឆ្នាំ១៩៥២។ ព្រះអង្គមានព្រះរាជបុត្រ២អង្គគឺ ៖
1. សម្តេចព្រះបរមនាថនរោត្ដម សីហមុនី ដែលជាព្រះមហាក្សត្រនៃព្រះរាជាណាចក្រ កម្ពុជាបច្ចុប្បន្ន ប្រសូតនៅថ្ងៃ ១៤ ខែឧសភា ឆ្នាំ១៩៥៣។
2. ព្រះអង្គម្ចាស់ នរោត្តម នរិន្ទ្រពង្ស ប្រសូតនៅថ្ងៃ ១៨ ខែកញ្ញា ឆ្នាំ១៩៥៤ បាន ចូលទីវង្គតនៅឆ្នាំ២០០៣ ដោយជំងឺបេះដូង។
កូនស្រីរបស់អ្នកស្រីប៉ុម ពាង ឈ្មោះអាន ម៉ារី អ៊ីហ្ស៊ី ( Anne Marie Izzi ) បានសិក្សានៅវិទ្យាល័យព្រះស៊ីសុវត្ថិ និងវិទ្យាល័យដេកាត ហើយបន្តការសិក្សានៅមហាវិទ្យាល័យវេជ្ជសាស្ត្រ នៅទីក្រុងភ្នំពេញ និងទីក្រុងបារីស ប្រទេសបារាំង រហូតទទួលបានសញ្ញាបត្រវេជ្ជបណ្ឌិត និងបានរៀបអាពាហ៍ពិពាហ៍ជាមួយព្រះអង្គម្ចាស់ស៊ីសុវត្ថិ មេថាវី នៅក្នុងឆ្នាំ១៩៥១។ ក្រោយពេលរៀបអាពាហ៍ពិពាហ៍រួច ឈ្មោះអាន ម៉ារី អ៊ីហ្ស៊ី ត្រូវបានដូរមកជា អ្នកម្នាងស៊ីសុវត្ថិ ណាណែត មេធាវី វិញ។
