កោះកុងក្រៅ ជាដែនកោះ ដែលធំជាងគេបង្អស់នៅក្នុងប្រទេសកម្ពុជា ហើយនោះក៏ជាកោះដែលមានឆ្នេរដ៏ស្រស់ស្អាត ផុសនៅកណ្ដាលផ្ទៃមហាសាគរ និងមានទឹកថ្លាពណ៌ខៀវស្រងាត់ ដែលគេហៅឈ្មោះម្យ៉ាងទៀតថាកោះមូល។ កោះកុងក្រៅ មានឆ្នេរខ្សាច់ពណ៌សប្រៀបបានគ្រាប់ពេជ្រ វែងអន្លាយជាប់ជាមួយផ្ទាំងថ្មធំ តូច ដុះអមជាប់ជាមួយវាលខ្សាច់ រួមជាមួយក្លិនផ្កាឈើព្រៃនៅជុំជិតទីនោះ ដែលតែងតែធ្វើឱ្យការកម្សាន្តរបស់លោក អ្នកទៅកាន់ឆ្នេរកោះមួយនេះ រឹតតែទទួលបានផាសុកភាពក្រៃលែង ។
កោះកុងក្រៅ មានបណ្ដោយប្រវែង ២២ គីឡូម៉ែត្រ ទទឹង ៧ គីឡូម៉ែត្រ ស្ថិតនៅស្រុកគិរីសាគរ មានចម្ងាយប្រហែល ៣៥ គីឡូម៉ែត្រពីក្រុងខេមរភូមិ ។ កោះកុងក្រៅមានកូនភ្នំជាច្រើន ដែលពោរពេញទៅដោយសម្រស់ធម្មជាតិយ៉ាងស្រស់បំព្រង មានកន្លែងទឹកធ្លាក់ចំនួន ១០ កន្លែង មានឆ្នេរសម្រាប់កម្សាន្តមុជទឹកសមុទ្រចំនួន៦កន្លែង ប្រមូលផ្តុំជីវចម្រុះ និងសត្វព្រៃជាច្រើនប្រភេទ គ្របទៅដោយព្រៃឈើក្រាស់ៗ ដែលធ្វើឲ្យតំបន់នេះកំពុងស្ថិតក្នុងក្ដីស្រមៃរបស់អ្នកទេសចរចង់មកទស្សនា។
ជាមួយការទៅកម្សាន្តនៅទីនោះ ភ្ញៀវគ្រប់រូបនឹងអាចងូតទឹកលេងកម្សាន្ត ជាមួយទឹកធ្លាក់ ដែលហូរចុះទៅសមុទ្រ តាមជ្រលងភ្នំធំតូច ឆ្លងកាត់ប្រទាក់ក្រឡាគ្នា ដែលអ្នកស្រុកនៅទីនោះច្រើនហៅថា អាល់ហ្ស៊ែន ជាតំបន់មួយដែលមានទឹកសាបហូរពីលើទឹកសមុទ្រ ។
នៅជិតៗកោះកុងក្រៅនោះ គេក៏អាចជិះទូកកម្សាន្តប្រជុំកោះ ដែលនៅជិតៗនោះ មានកោះតូចៗជាច្រើនដូចជា កោះស្ដេច កោះខ្មោច(កោះរីករាយ) កោះអណ្ដើក កោះក្រសា ពយជប៉ុន ដែលសុទ្ធតែជាកន្លែងកម្សាន្ត ដ៏មានផាសុកភាព ឬមួយក៏អាចកម្សាន្ដនៅបាតសមុទ្របានដែរ ដោយការមុជទឹកទស្សនាផ្កាថ្ម និងត្រីសមុទ្រដ៏ច្រើនសន្ធឹកសន្ធាប់ ព្រោះជាកន្លែងដែលអភិរក្សជលផលសម្រាប់ត្រីសមុទ្រគ្រប់ប្រភេទ ។
