កញ្ញា ហ៊ាន សុជាតា អាយុ ២៨ឆ្នាំ ធ្វើការនៅស្ថានទូតអូស្ត្រាលី និងកញ្ញា
ម៉ៅ ច័ន្ទដាលី អាយុ ២៧ឆ្នាំ
ធ្វើការនៅគណៈកម្មាធិការកាកបាទក្រហមអន្តរជាតិ
បានបង្កើតកំណត់ត្រាថ្មីមួយសម្រាប់ប្រទេសកម្ពុជា
ដោយបានឡើងដល់ចំណុច Everest Base Camp ដែលមានកម្ពស់ ៥៣៦៤ម៉ែត្រ
នៅថ្ងៃទី១៧ ខែឧសភា ឆ្នាំ២០១៩នេះ បន្ទាប់ពីដើរចំនួន៦
ទៅ៧ម៉ោងក្នុងមួយថ្ងៃ នៅលើចម្ងាយផ្លូវប្រមាណជា ១២៨គីឡូម៉ែត្រ។
ការព្យាយាមលើកដំបូងរបស់ជនជាតិខ្មែរ ធ្វើឡើងកាលពីឆ្នាំ២០១២
ដែលពេលនោះប្អូនប្រុសឈ្មោះ លឹម ពិសិដ្ឋ អាយុ២៧ឆ្នាំ
បានស្លាប់នៅពេលឡើងជាមួយនឹងគោលបំណងទៅដោតទង់ជាតិកម្ពុជា
នៅលើកំពូលភ្នំនេះ។
សុជាតា និង ដាលី បានចំណាយពេលដើរចំនួន៧ថ្ងៃ
ជាមួយមគ្គុទ្ទេសក៍ជនជាតិនេប៉ាល់១រូប
ដោយត្រូវពុះពារជំនះអាកាសធាតុដ៏លំបាកបំផុត រួមមាន
កម្រិតទាបនៃបរិមាណអុកស៊ីសែន
ដែលទាមទារឲ្យមានការស៊ូទ្រាំខ្លាំងបំផុត។
សុជាតា គឺជាអ្នកឡើងភ្នំដ៏មានបទពិសោធន៍កន្លងមក។ សុជាតា បានឡើងភ្នំ
Fansipan នៅវៀតណាម ដែលមានកម្ពស់ ៣១៤៣ម៉ែត្រ កាលពីឆ្នាំ២០១៧
ដែលវាគឺជាភ្នំខ្ពស់បំផុតនៅឥណ្ឌូចិន។ កាលពីឆ្នាំ២០១៨ សុជាតា
ក៏បានឡើងភ្នំឱរ៉ាល់ដែលជាភ្នំខ្ពស់បំផុតនៅកម្ពុជា មានកម្ពស់
១៨១៣ម៉ែត្រ។
