ក/ ជំងឺទឹកនោមផ្អែមមានពីរប្រភេទ គឺ ៖
ទី១ ប្រភេទរាងកាយមិនអាចផលិតអាំងស៊ុយលីនបាន
ទី២ ប្រភេទអាំងស៊ុយលីនត្រូវបានផលិតគ្រប់ហើយតែប្រើមិនកើត។
ខ/ អាការៈរួមនៃជំងឺទឹកនោមផ្អែមប្រភេទទី១ និងទី២ ៖
— ស្រេកទឹកជាប់ និងស្ងួតមាត់ទោះបីជាអាកាសធាតុមិនក្តៅ ឬមិនធ្វើការងារធ្ងន់ក៏ដោយ
— នោមញឹកដោយមិនបានញ៉ាំទឹកច្រើន
— ស្រកទម្ងន់ដោយមិនដឹងខ្លួនទោះបីជាមិនបានតមអាហារ ឬមិនញ៉ាំអាហារក៏ដោយ
– ឃ្លានខ្លាំង និងមិនមានអារម្មណ៍ថាឆ្អែតសោះក្រោយពីញ៉ាំច្រើនរួច
— អស់កម្លាំង និងខ្សោយទោះបីជាញ៉ាំអាហារច្រើនហើយក៏ដោយ
– មានអារម្មណ៍ថាមិនស្រួលក្នុងខ្លួន និងចង្អោ
— ស្ពឹក ឬមានអារម្មណ៍ឈឺឈៀបៗនៅបាតដៃ និងប្រអប់ជើង
– ដកដង្ហើមធំក្លិនផ្អែមៗ។
គ/ អាការៈដែលទាក់ទងនឹងជំងឺទឹកនោមផ្អែមប្រភេទទី២ ៖
— ភ្នែកស្រាប់តែស្រវាំងភ្លាមៗ ដែលម្តងកើតម្តងបាត់ និងគ្មានកត្តាខាងក្រៅចូលរួមសោះ
– ស្បែកទៅជាខ្មៅជាពិសេសតំបន់ក ឃ្លៀក និងគ្រលៀន
-- របួស ឬកន្លែងជាំស្បែកក្រជា
– រមាស់ស្បែកនៅជុំវិញទ្វារមាស ឬគ្រលៀន
— ឧស្សាហ៍មានការបង្ករោគដោយមេរោគផ្សិត និងនោមញឹក
— លិង្គមិនអាចឡើងរឹង
— ធាត់ជ្រុល។
ឃ/ ដើម្បីទប់ស្កាត់កំណើនជាតិស្ករឡើងខ្ពស់ គួរចៀសវាង ៖
១. ភាពតានតឹងក្នុងអារម្មណ៍ ឬស្ត្រេស
យោងតាមអ្នកជំនាញផ្នែកសុខភាពជាច្រើនបានឱ្យដឹងថា ភាពតានតឹងក្នុងអារម្មណ៍ ខ្លាំងពេក ក៏ជាអ្វីដែលបង្កបញ្ហាជាតិស្ករក្នុងឈាមកើនឡើងខ្ពស់ផងដែរ។ នោះក៏ព្រោះ តែភាពស្ត្រេសបង្កើនចំណង់អាហារដែលធ្វើឱ្យអ្នកឃ្លានផ្អែម។
២. គេងមិនគ្រប់
ការគេងបានពី ៧ ទៅ ៩ ម៉ោងក្នុងមួយយប់ គឺល្អណាស់សម្រាប់សុខភាពរាងកាយ ទាំងមូល រួមទាំងកម្រិតនៃជាតិស្ករក្នុងឈាម ។ នោះក៏ព្រោះតែ ការគេងមិនគ្រប់ ជះឥទ្ធិពល ដល់រាងកាយក្នុងការប្រើប្រាស់បំលែងជាតិស្ករ ហើយលទ្ធផលចុងក្រោយ ជាតិស្ករដែលលើសនឹងត្រូវប្រមូលផ្ដុំក្នុងឈាម។
៣. ជាតិផ្អែមសិប្បនិម្មិត
ប្រសិនបើ គិតថាការទទួលទានជាតិផ្អែមសិប្បនិម្មិត ជំនួសស្ករធម្មតា គឺមិនប៉ះពាល់ ដល់ជាតិស្ករក្នុងឈាម ចូរគិតម្ដងទៀត។ តាមពិតទៅជាតិផ្អែមសិប្បនិម្មិតអាចបង្កើន កម្រិត នៃជាតិស្ករក្នុងឈាមគួរឱ្យកត់សម្គាល់។ នោះក៏ព្រោះតែ ជាតិផ្អែមសិប្បនិម្មិតជះ ឥទ្ធិពលលើសុខភាពពោះវៀនដែលនឹងបង្កផលប៉ះពាល់ដល់កម្រិតជាតិស្ករក្នុងឈាម។
៤. កង្វះជាតិទឹកក្នុងរាងកាយ
កង្វះជាតិទឹកក្នុងរាងកាយក៏ជាកត្តាចម្បងមួយ នៃកំណើនជាតិស្ករឡើងខ្ពស់ក្នុងឈាម។ ដូច្នេះ ប្រសិនបើមានជំងឺទឹកនោមផ្អែម ឬកំពុងប្រឈមមុខនឹងហានិភ័យនៃជំងឺនេះ ចូរ ព្យាយាមទទួលទានទឹកឱ្យបានប្រហែល ២ លីត្រក្នុងមួយថ្ងៃ។
៥. កង្វះលំហាត់ប្រាណ
ការមិនធ្វើសកម្មភាពរាងកាយអ្វីសោះក៏បង្កើនកម្រិត នៃជាតិស្ករក្នុងឈាមផងដែរ។ អ្នក ធ្លាប់ដឹងទេថា ការធ្វើលំហាត់ប្រាណអាចផ្ដល់ នូវអត្ថប្រយោជន៍ស្មានមិនដល់ជាច្រើន សម្រាប់អ្នកជំងឺទឹកនោមផ្អែម រួមបញ្ចូលទាំងជួយបញ្ចុះកម្រិត នៃជាតិស្ករក្នុងឈាម និង ស្ត្រេស? យោងតាមមជ្ឈមណ្ឌលស្រាវជ្រាវផ្នែកវេជ្ជសាស្ត្រ ដ៏សំខាន់បំផុតមួយនៅលើ ពិភពលោក NIH បានណែនាំឱ្យធ្វើលំហាត់ប្រាណយ៉ាងហោចណាស់ ១៥០ នាទីរាល់ សប្តាហ៍។ ហើយចំពោះអ្នកជំងឺទឹកនោមផ្អែម ត្រូវហាត់ប្រាណជាប្រចាំមិនគួរផ្អាក ឬ រំលងលើសពី ២ ថ្ងៃជាប់គ្នាឡើយ។
