ភ្នាក់ងារសុខភាពរបស់អង្គការសហប្រជាជាតិ កាលពីថ្ងៃអង្គារម្សិលមិញនេះ បានប្រកាសថាដាក់ឈ្មោះផ្លូវការឲ្យវីរុសកូរ៉ូណាថា “COVID-19” និងបានបញ្ជាក់ថា វីរុសនោះវាធ្វើឲ្យមានការគំរាមកំហែងយ៉ាងខ្លាំងដល់ពិភពលោក ប៉ុន្តែនៅមានឱកាសទប់ស្កាត់វា។
ឥឡូវនេះ យើងមានឈ្មោះសម្រាប់ជំងឺនោះហើយ ឈ្មោះវាគឺ COVID-19″។ នេះជាការបញ្ជាក់របស់លោក Tedros Adhanom Ghebreyesus ប្រធានអង្គការសុខភាពពិភពលោក (WHO) ប្រាប់អ្នកសារព័ត៌មានក្នុងទីក្រុងហ្សឺណែវ។
លោកបញ្ជាក់លម្អិតថា “CO” តំណាងឲ្យ (Corona), “VI” តំណាងឲ្យ “Virus” ខណៈដែល “D” តំណាងឲ្យ “Disease” ចំណែក “19” គឺជាឆ្នាំរបស់វា ខណៈដែលវាបានផ្ទុះឡើង និងត្រូវបានគេដឹងនៅថ្ងៃទី ៣១ ខែធ្នូ ឆ្នាំ ២០១៩។
សូមបញ្ជាក់ថា ដំបូងឡើយ អង្គការសុខភាពពិភពលោក បានដាក់ឈ្មោះបណ្តោះអាសន្នឲ្យវីរុសនោះថា ជំងឺផ្លូវដង្ហើមធ្ងន់ធ្ងរ (2019-nCoV acute respiratory disease) ហើយគណៈកម្មការសុខភាពជាតិចិន នៅសប្តាហ៍នេះ បាននិយាយថា ខ្លួនបានហៅវីរុសនោះបណ្តោះអាសន្នថាជំងឺរលាកសួតប្រភេទថ្មី (novel coronavirus pneumonia ឬ NCP)។
