ព្រះសម្តេចក្រុមព្រះ ប្រសូតនៅថ្ងៃទី២ ខែមករា ឆ្នាំ១៩៤៤ នារាជធានីភ្នំពេញ ជាព្រះរាជបុត្រា នៃព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណ ភាពដែនដី និងឯកភាពជាតិខ្មែរ ព្រះបរមរតនកោដ្ឋ និងអ្នកម្នាង ផាត់ កាញ៉ុល នាដការី នៃរបាំព្រះរាជទ្រព្យ។ ទ្រង់ជាព្រះអនុជរួមឧទរជាមួយសម្តេចរាជបុត្រីព្រះរៀម នរោត្តម បុប្ផាទេវី ។
សម្តេចក្រុមព្រះធ្លាប់ធ្វើជានាយករដ្ឋមន្រ្តីទី១ ពីឆ្នាំ១៩៩៣ដល់១៩៩៧ ខណៈសម្តេចតេជោ ហ៊ុន សែន ជានាយករដ្ឋមន្រ្តីទី២ កាលពី បោះឆ្នោតអាណត្តិទី១ ក្នុងពេលអ៊ុនតាក់ជាអ្នករៀបចំឲ្យមានការបោះឆ្នោត។
សម្តេចក្រុមព្រះ នរោត្តម រណឫទ្ធិ បានយាងសោយព្រះទិវង្គត ក្នុងព្រះជន្ម ៧៧ ព្រះវស្សា នាវេលាម៉ោង៩:៤០នាទីព្រឹក នៅសាធារណរដ្ឋបារាំង និងវេលាម៉ោង ៣:៤០នាទី ម៉ោងនៅទីក្រុងភ្នំពេញ ថ្ងៃទី២៨ ខែវិច្ឆិកា ឆ្នាំ២០២១ ដោយព្រះជរាពាធ។
ព្រះសពរបស់សម្តេចក្រុមព្រះ នរោត្តម រណឫទ្ធិ ព្រះប្រធានឧត្តមក្រុមប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា និងជាប្រធានគណបក្សហ៊្វុនស៊ិនប៉ិច បានយាងដង្ហែ តាមជើងយន្តហោះពិសេស ពីប្រទេសបារាំង មកដល់ប្រទេសកម្ពុជានៅថ្ងៃទី៥ ខែធ្នូ ឆ្នាំ២០២១។
ពិធីបុណ្យព្រះសពរបស់ព្រះអង្គ តម្កល់ធ្វើបុណ្យតាមប្រពៃណីសាសនា នៅព្រះរាជដំណាក់ព្រះអង្គ នៅផ្លូវសម្តេចប៉ាន់ ស្ថិតនៅសង្កាត់បឹងរាំង ខណ្ឌដូនពេញ រាជធានីភ្នំពេញ មានរយៈពេល ៤ថ្ងៃ ចាប់ពីថ្ងៃទី៥ ដល់ថ្ងៃទី៨ ខែធ្នូ ឆ្នាំ២០២១ ។
សម្តេចរាជបុត្រីព្រះរៀម នរោត្តម បុប្ផាទេវី និង សម្តេចក្រុមព្រះ នរោត្តម រណឫទ្ធិ បានព្រះប្រសូតក្នុងខែតែមួយ និងសោយព្រះទិវង្គត-ពិលាល័យ ក្នុងខែតែមួយដូចគ្នា ៖
សម្តេចរាជបុត្រីព្រះរៀម ព្រះប្រសូតនៅថ្ងៃទី៨ ខែមករា ឆ្នាំ១៩៤៣ ។
សម្តេចក្រុមព្រះ ព្រះប្រសូតនៅថ្ងៃទី២ ខែមករា ឆ្នាំ១៩៤៤ មុនក្រោយគ្នា១ឆ្នាំ ។
សម្តេចរាជបុត្រីព្រះរៀម សោយព្រះពិលាល័យនៅថ្ងៃទី១៨ ខែវិច្ឆិកា ឆ្នាំ២០១៩។
សម្តេចក្រុមព្រះ សោយព្រះទិវង្គត ថ្ងៃទី២៨ ខែវិចិ្ឆកា ឆ្នាំ២០២១ ។
ជីវប្រវត្តិសង្ខេបរបស់សម្ដេចក្រុមព្រះ នរោត្តម រណឫទិ្ធ
នៅព្រឹកថ្ងៃទី១៧ ខែមិថុនា ឆ្នាំ២០១៨នេះ សម្តេចក្រុមព្រះ នរោត្តម រណឫទ្ធិ ព្រះប្រធានគណបក្សហ៊្វុនស៊ិនប៉ិច បានជួបគ្រោះថ្នាក់ចរាចរណ៍នៅក្នុងស្រុកព្រៃនប់ ខេត្តព្រះសីហនុ ពេលយាងទៅជួបសំណេះសំណាលជាមួយ ប្រជាពលរដ្ឋនៅខេត្តព្រះសីហនុ។
គ្រោះថ្នាក់នេះបណ្តាលឲ្យព្រះអង្គ និងអ្នកម្នាង អ៊ុក ផល្លា រងរបួសធ្ងន់។ ព្រះអង្គ និងអ្នកម្នាង បានជួយ សង្គ្រោះពីក្រុមគ្រូពេទ្យ។
គួររម្លឹកថា កាលពីប៉ុន្មានឆ្នាំមុន ព្រះអង្គ និងអ្នកម្នាង អ៊ុក ផល្លាក៏ធ្លាប់ជួបគ្រោះថ្នាក់ធ្ងន់ធ្ងរបែបនេះផងដែរ គឺ ថ្ងៃទី២៤ ខែមេសា ឆ្នាំ២០១៥កន្លងទៅ ក្រោយពីវិលត្រឡប់មកពីជួបអ្នកគាំទ្រនៅក្នុងខេត្តកំពង់ចាម នៅកំណាត់ផ្លូវជាតិលេខ៧ក្នុងភូមិព្រៃខ្វិត ឃុំខ្វិតធំ ស្រុកព្រៃឈរ ខេត្តកំពង់ចាម ដោយរថយន្តដឹកដីបានបើកចូលកាត់ក្បួនរថយន្តទ្រង់ក្នុងដំណើរមកកាន់រាជធានីភ្នំពេញ។
ជីវប្រវត្តិត្រួសៗរបស់អ្នកម្នាងអ៊ុក ផល្លា កាលពីវ័យកុមារភាព រហូតទទួលមរណភាព ដោយគ្រោះថ្នាក់ចរាចរណ៍នៅព្រឹកថ្ងៃទី១៧ ខែមិថុនា ឆ្នាំ២០១៨
អ្នកម្នាង អ៊ុក ផល្លា ជាអតីតតំណាងអប្សរារបស់ប្រទេសកម្ពុជាបានទទួលមរណភាពកាលពីវេលាម៉ោងប្រមាណជាង១២ថ្ងៃត្រង់ នៅថ្ងៃទី១៧ ខែមិថុនា ឆ្នាំ២០១៨នេះ តែប៉ុន្មានម៉ោង ក្រោយពីជួបគ្រោះថ្នាក់ចរាចរណ៍នៅខេត្តព្រះសីហនុ ដោយសារតែរងរបួសធ្ងន់ធ្ងរពេក។ រីឯសម្ដេចក្រុមព្រះនរោត្ដម រណឫទ្ធិ ជាព្រះស្វាមី បានទទួលរងរបួសធ្ងន់ត្រូវបានដឹកតាមឧទ្ធម្ភាគចក្រ មកបន្តសង្គ្រោះនៅរាជធានីភ្នំពេញ។
អ្នកម្នាង អ៊ុក ផល្លា បានចូលហាត់រៀនរបាំបុរាណនៅសាលាភូមិន្ទវិចិត្រសិល្បៈ ពេលមានវ័យ៩ឆ្នាំ ហើយបានចេញសម្តែងលើកដំបូងជាសាធារណៈពេលចម្រើនវ័យបាន១៣ឆ្នាំ។ អ្នកម្នាងធ្លាប់មានចំណងអាពាហ៍ពិពាហ៍ ដំបូងជាមួយឯកឧត្ដម វេង សេរីវុឌ្ឍ អតីតរដ្ឋមន្រ្តីក្រសួងទេសចរណ៍។ មិនយូរប៉ុន្មានជីវិតអាពាហ៍ពិពាហ៍របស់ អ្នកម្នាងអ៊ុកផល្លាបានដល់ផ្លូវបំបែក។ ក្រោយពីបែកបាក់ស្វាមី អតីតតួឯកអប្សរានេះត្រូវបានសម្តេចក្រុមព្រះនរោត្តមរណឬទ្ធិសព្វព្រះទ័យ និងបានសាងជីវិតគ្រួសារជាមួយគ្នា ក្រោយពីព្រះអង្គបានលែងលះអ្នកម្នាង មារី រណឫទ្ធិ។ រួមរស់ជាមួយសម្តេចក្រុមព្រះ នរោត្តម រណឫទ្ធិ អ្នកម្នាងមានព្រះនាមថា នរោត្តម ផល្លា រណឬទ្ធិ។ អ្នកម្នាងមានបុត្រ២ព្រះអង្គជាមួយសម្តេចក្រុមព្រះជាចំណងដៃគឺបុត្រច្បងមាននាម នរោត្តម សុធាឫទ្ធិ ប្រសូតក្នុងឆ្នាំ២០០៣ និងបុត្រទី២មាននាម នរោត្តម រណវង្ស ប្រសូតក្នុងឆ្នាំ ២០១១។
អ្នកម្នាង អ៊ុក ផល្លា បានទទួលមរណភាពនៅអាយុ៣៩ឆ្នាំ « កើតថ្ងៃទី២៧ ខែកក្កដា ឆ្នាំ១៩៧៩ » ហើយ អ្នកម្នាងក៏បានឈរឈ្មោះជាបេក្ខជនតំណាងរាស្ត្រពេញសិទ្ធលំដាប់លេខរៀងទី១ នៃគណបក្សហ្វ៊ុនស៊ិនប៉ិច សម្រាប់មណ្ឌលព្រៃវែង។
អ្នកម្នាង គឺជាអតីតអ្នករបាំអប្សរា ប្រចាំប្រទេស នាអំឡុងឆ្នាំ៩០។ រីឯគ្រោះថ្នាក់ចរាចរណ៍ ដែលបានឆក់យកជីវិតរបស់អ្នកម្នាង គឺកើតឡើងនៅលើផ្លូវជាតិលេខ៤ ក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ ត្រង់គីឡូម៉ែត្រលេខ ២០០-២០១ កាលនៅព្រឹកថ្ងៃទី១៧ មិថុនា ឆ្នាំ២០១៨នេះ ដែលបានបណ្ដាលឱ្យអ្នកធ្វើដំណើរ៧នាក់ផ្សេងទៀតរងរបួសធ្ងន់ និងស្រាល។
ពិធីបុណ្យសពរបស់អ្នកម្នាងអ៊ុក ផល្លា
នាវេលាព្រឹកថ្ងៃអង្គារ ៧កើត ខែបឋមាសាឍ ឆ្នាំច សំរិទ្ធស័ក ព.ស ២៥៦២ ត្រូវនឹងថ្ងៃទី១៩ ខែមិថុនា ឆ្នាំ២០១៨ សម្តេចព្រះមហាក្សត្រិយ៍ នរោត្តម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឬទ័យស្តេចយាងគោរពវិញ្ញណក្ខន្ធ និងប្រោសព្រះរាជទានព្រះរាជទ្រព្យចូលរួមរំលែកមរណៈទុក្ខ សពអ្នកម្នាង អ៊ុក ផល្លា នៃសម្តេចក្រុមព្រះ នរោត្តមរណឬទ្ធិ ព្រះប្រធានឧត្តមក្រុមប្រឹក្សាផ្ទាល់ព្រះមហាក្សត្រ ។
ពិធីគោរពវិញ្ញាណក្ខន្ធនេះ បានធ្វើឡើងនាវត្តបទុមវត្តីរាជវរារាម ដោយមានការយាងអមដង្ហែដោយ សម្តេច ព្រះមហិស្សា នរោត្តម ច័ក្រពង្ស សម្តេចរាជបុត្រី ព្រះអនុជ នរោត្តម អរុណរស្មី សម្តេចចៅហ្វាវាំង គង់ សំអុល ព្រមទាំងព្រះរាជវង្សានុវង្ស នាម៉ឺនសព្វមុខមន្រ្តីជាច្រើន។
រហូតមកដល់ព្រឹកថ្ងៃទី ទី២០ ខែមិថុនា ឆ្នាំ២០១៨ ពិធីដង្ហែសពអ្នកម្នាង អ៊ុក ផល្លា ក៏បានចាប់ផ្ដើម ហើយជាបន្តបានបូជាជាកិច្ចចុងក្រោយ។
ព្រះអង្គម្ចាស់ រណឫទ្ធិ ព្រះជន្ម ២៧ឆ្នាំ និងព្រះអង្គម្ចាស់ នរៈទីប៉ោ ព្រះជន្ម ២៥ឆ្នាំ បានឡើងតុលាការសឹកកម្ពុជានៃរបបលន់ នល់ នៅថ្ងៃទី១៧ ខែកក្កដា ឆ្នាំ១៩៧០ ជាប់ចោទពីបទធ្វើ សកម្មភាពភេរវកម្ម រួមទាំងការបំផ្ទុះគ្រាប់បែកនៅស្ថានទូតអាមេរិកនាទីក្រងភ្នំពេញ។
តែងតាំង ព្រះអង្គម្ចាស់ នរោត្តម ចក្រាវុឌ្ឍ ជាព្រះប្រធានស្ដីទីគណបក្សហ្វ៊ុនស៊ិនប៉ិច
