កើតថ្ងៃទី០៣ ខែមករា ឆ្នាំ១៩៣៣ នៅឃុំច្បារអំពៅ ស្រុកកៀនស្វាយ ខេត្រកណ្តាល ជាកូនរបស់លោក ឡុង មាស និងនាង នាង អៀងពុធ។ បានចូលរៀននៅវិទ្យាល័យដ៏មានកិត្យានុភាពនៅប្រទេសកម្ពុជា គឺ វិទ្យាល័យស៊ីសុវត្ថិ ពីឆ្នាំ ១៩៤៦ ដល់ឆ្នាំ១៩៥២ ហើយបានបន្តទៅរៀននៅប្រទេសបារាំង ពីឆ្នាំ១៩៥៣ ដល់ឆ្នាំ ១៩៥៥។ ក្រោយពេលត្រឡប់មកវិញ បានចូលបម្រើការងារនៅរតនាគារជាតិ។ ឆ្នាំ១៩៥៨ បានជាប់ឆ្នោតជាតំណាងរាស្ត្រប្រចាំខេត្រស្ទឹងត្រែង ហើយក៏ជាអ្នកតំណាងរាស្រ្តក្មេងជាងគេនៅជំនាន់នោះដែរ បន្ទាប់មកបានទទួលតំណែងជាអនុរដ្ឋលេខាធិការផ្នែកសកម្ម ភាពពលកម្ម និងសង្គម។ ឆ្នាំ១៩៦២ បានជាប់ឆ្នោតជាតំណាងរាស្រ្តសាជាថ្មី នៅអំឡុងពេលនោះដែរ គាត់ត្រូវបានគេស្គាល់ក្នុងនាមជាអ្នកនិពន្ធ សៀវភៅប្រលោមលោកស្នេហាមួយចំនួន ដែលភាគច្រើនបានចេញផ្សាយតាមកាសែត។ គាត់ត្រូវបានផ្តល់តំណែងជារដ្ឋលេខាធិការក្រសួងសេដ្ឋកិច្ច ប៉ុន្តែគាត់ត្រូវបានគេបង្ខំឲ្យចុះចេញពីតំណែងវិញនៅឆ្នាំ១៩៦៣ ដោយសារតែគាត់បានប្រឆាំងជាចំហចំពោះការសម្រេចព្រះទ័យរបស់ព្រះប្រមុខរដ្ឋ នរោត្តម សីហនុ ដែលចង់ធ្វើជាតូបនីយកម្មលើធនាគារ និងជំនូញបរទេស។ គាត់នៅតែរក្សាកៅអីតំណាងរាស្ត្រនៅក្នុងការបោះឆ្នោតឆ្នាំ១៩៦៦។ គាត់បានកាន់តំណែងជារដ្ឋមន្រ្តីក្រសួងព័ត៌មានពីឆ្នាំ១៩៧១ ដល់១៩៧២ និងរដ្ឋមន្រ្តីក្រសួងការបរទេសពីឆ្នាំ១៩៧២ ដល់ឆ្នាំ១៩៧៣។ នៅថ្ងៃទី០៩ ខែធ្នូ ឆ្នាំ១៩៧៣ បានបន្តតំណែងពីលោក អ៊ីន តាំ ជានាយករដ្ឋមន្រ្តីនៃសាធារណរដ្ឋខ្មែររហូតដល់ថ្ងៃ១៧ ខែមេសា ឆ្នាំ១៩៧៥ ។ នៅថ្ងៃទី០២ ខែមេសា ឆ្នាំ១៩៧៤ គាត់បានក្លាយជាសមាជិកម្នាក់ក្នុងចំណោមសមាជិកទាំង៤នៃក្រុមប្រឹក្សាប្រតិបត្តិមួយ ដែលរូមមានប្រធានាធិបតី លន់ នល់ ទ្រង់ ស៊ីសុវត្ថិ សិរីមតៈ និងឧត្តមសេនីយ៍ សូស្ថេន ហ្វឺរណាន់ដេស។ នៅថ្ងៃទី ០៨ ខែមេសា ឆ្នាំ១៩៧៥ គាត់បានព្យាយាមចរចា ដើម្បីសន្តិភាពជាមួយតំណាងពួកខ្មែរក្រហម នៅក្រុងបាងកក តែមិនបានសម្រេច។ ឡុង បូរ៉េត បដិសេធមិនព្រមឲ្យគេជម្លៀសគាត់ចេញឡើយ នៅតែទៅធ្វើការរហូតដល់ថ្ងៃខ្មែរក្រហមវាយបែកក្រុងភ្នំពេញ (១៧មេសា១៩៧៥) ចុងក្រោយព្យាយាមឡើងឧទ្ធម្ភាចក្រជាមួយប្រពន្ធ និងកូន ប៉ុន្តែពួកយោធាខ្មែរបានបាញ់ស្រោចយ៉ាងសាហាវលើឧទ្ធម្ភាចក្រ។ ឡុង បូរ៉េត ជិះឡានស៊ីត្រូពណ៌ខ្មៅដែលបើកដោយប្រពន្ធរបស់គាត់មកឈប់នៅក្រៅស្ថានទូតបារាំង ហើយបានប្រគល់ខ្លួនឲ្យពួកខ្មែរក្រហមដោយដើរជាជួរជាមួយអ្នកទោសជាច្រើនទៀត។ កុយ ធួន មេបញ្ជារការរងទ័ពស្រួចរបស់ខ្មែរក្រហម បានរៀបចំ «គណកម្មការកំចាត់ខ្មាំង» នៅសណ្ឋាគារមនោរម្យ មានភារកិច្ចដំបូងគឺ ប្រហារជិវិតមេដឹកនាំកំពូលរបស់រដ្ឋាភិបាល។ វិទ្យុខ្មែរក្រហម បានរាយការណ៍នៅពេលក្រោយមកថា ឡុង បូរ៉េត ត្រូវបានប្រហារជិវិតនៅក្នុងបុរីកីឡា (Cercle Sportif) នៅក្រុងភ្នំពេញដោយកាត់ក្បាល ប៉ុន្តែរបាយការណ៍ផ្សេងទៀតបានបញ្ជាក់ថា គាត់ និងទ្រង់ ស៊ីសុវត្ថិ សិរីមតៈ ត្រូវបានប្រហារជិវិតដោយក្រុមបាញ់កាំភ្លើង។ ឡុង បូរ៉េត មានកូនបី ស្រីពីរ ប្រុសមួយ (ធី) សព្វថ្ងៃរស់នៅអាមេរិក។
