សត្វក្រៀល មានបីប្រភេទផ្សេងគ្នាដែលរស់នៅក្នុងឧបទ្វីបឥណ្ឌា អាស៊ីអាគ្នេយ៍ និងភាគខាងជើងប្រទេសអូស្រ្តាលី។ ក្នុងប្រទេសកម្ពជា សត្វក្រៀលមានតែមួយប្រភេទប៉ុណ្ណោះមានខ្លួនធំ ហើយខ្ពស់ជង្គ្រោង សម្បុរប្រផេះ ក្បាលត្រងោលពណ៌ក្រហម មានបណ្ទូលក្បាលពណ៌ប្រផេះ គ្មានរោម ជើងក្រហមវែង កវែង ចំពុះត្រង់វែង និងសម្រែកឮខ្លាំងៗពេលជួបគ្នាម្តងៗដោយតែងចឹកប្រឡែងគ្នាលេង។ ក្រៀល មានទំហំខ្លួនចាប់ពី ១៥២ ទៅ ១៥៦ស.ម ចូលចិត្តរស់នៅតំបន់ទំនាបលិចទឹក វាលស្រែ តាមតំបន់វាលស្មៅក្នុងព្រៃរបោះដែលមានសំណើម។ នៅរដូវប្រាំងវារកស៊ីជាហ្វូង ឯរដូវវស្សាវាបន្តពូជតែឯកឯង។
សត្វក្រៀលរកស៊ី និងរស់នៅជាហ្វូង ហើយបន្តពូជញីមួយ ឈ្មោលមួយជាដៃគូតែមួយ គត់ក្នុងមួយវដ្ដជីវិត។
ចំណីសំខាន់ៗរបស់សត្វក្រៀល មាន មើមផ្លុង មើមព្រលិត កូនកង្កែប ក្ដាម ពស់ និងស្រូវជាដើម។
ក្នុងប្រទេសកម្ពុជា សត្វក្រៀលមានសំបុក ពង កូន តែនៅក្នុងតំបន់ទំនាប់ខាងជើងដែល លាតសន្ធឹងតាមដែនជម្រកសត្វព្រៃឆែប ដែនជម្រកសត្វព្រៃព្រះរកា និងដែនជម្រកសត្វព្រៃគូលែនព្រហ្មទេព ភូមិសាស្រ្តខេត្តព្រះវិហារ។ រដូវបន្តពូជរបស់សត្វក្រៀល គឺនៅរដូវវស្សា ចន្លោះខែមិថុនា និងខែកញ្ញា ហើយមានពងចំនួនពី១ ទៅ៣គ្រាប់ក្នុងក្រៀលញីមួយក្បាល។
នៅក្នុងរដូវប្រាំង សត្វក្រៀលភាគច្រើនតែងតែផ្លាសទីចេញពីកន្លែងបន្តពូជទៅរកចំណីនៅតាមតំបន់ផ្សេងៗក្នុងប្រទេសកម្ពុជា រួមមានតំបន់ការពារទេសភាពអាងត្រពាំងថ្ម ភូមិសាស្រ្ត ខេត្តបន្ទាយមានជ័យ ដែនជម្រកសត្វព្រៃសៀមប៉ាងខាងលិច ភូមិសាស្រ្តខេត្តស្ទឹងត្រែង
ដែនជម្រកសត្វព្រៃលំផាត់ ភូមិសាស្រ្តខេត្តរតនគីរី តំបន់ការពារទេសភាពទំនាបខាងជើងទន្លេសាប ភូមិសាស្រ្តខេត្តកំពង់ធំ តំបន់ការពារទេសភាពបឹងព្រៃល្ពៅ ភូមិសាស្រ្តខេត្តតាកែវ និងតំបន់ការពារទេសភាពអន្លង់ព្រីង ភូមិសាស្រ្តខេត្តកំពត។
តាមជំរឿនក្នុងឆ្នាំ ២០១៨ សត្វក្រៀលក្នុងប្រទេសកម្ពុជាមានចំនួន ២៤២ក្បាល។
