ប្រវត្តិព្រះអង្គម្ចាស់ នរោត្តម កន្តុល(១៩២០-៧៦) ព្រះអង្គម្ចាស់ នរោត្តម កន្តុល ទ្រង់ប្រសូតនៅថ្ងៃទី១៥ កញ្ញា ឆ្នាំ១៩២០ នារាជធានីភ្នំពេញ ក្នុងរជ្ជកាលហ្លួង ព្រះស៊ីសុវត្ថិ "ព្រះរាជានុកោដ្ឋ"។ បិតានាម ព្រះអង្គម្ចាស់នរោត្តម សុីង្ហា និងព្រះមាតានាម ម្ចាស់ក្សត្រី ព្រះរៀម សុីសុវត្ថិ ថាវ៉េតរង្សី។ព្រះអង្គម្ចាស់ជាបុត្រាច្បង ក្នុងចំណោមអនុជទាំង៥អង្គ។ ព្រះអង្គម្ចាស់ នរោត្តម កន្តុល គឺជាព្រះរាជនត្តាទួត(ចៅទួត)របស់ព្រះបាទ នរោត្តម ព្រះសុវណ្ណកោដ្ឋ និងព្រះនត្តា(ចៅ)ព្រះអង្គម្ចាស់ ចន្ទលេខា ហៅ"ម្ចាស់តូ" រាប់តាមសែព្រះបិតា និងជាព្រះនត្តាព្រះបាទ ស៊ីសុវត្ថិមុនីវង្ស រាប់តាមសែព្រះមាតា។ បើគិតតាមខ្សែលោ ហិតព្រះបិតា គឺព្រះអង្គមានព្រះអយ្យកោទួតមួយ ជាមួយព្រះបាទ នរោត្តម សីហនុ។
បើគិតតាមខ្សែលោហិតព្រះមាតាវិញ គឺព្រះអង្គ មានព្រះមាតាព្រះនាម ស៊ីសុវត្ថិ ថាវេតរង្សី(ព្រះរាជបុត្រីព្រះករុណាស៊ីសុវត្ថិមុនីវង្ស) ដែលត្រូវជាព្រះរៀមនៃព្រះមហាក្សត្រីយានី ស៊ីសុវត្តិ កុសមៈនារីរត្ថន៍ ជាព្រះមាតាព្រះករុណា ព្រះបរមរតនកោដ្ឋ នរោត្តម សីហនុ។
ដូច្នេះ ព្រះអង្គម្ចាស់ នរោត្តម កន្តុល ត្រូវជាព្រះរៀមជីដូនមួយ(ខ្សែមាតា)ជាមួយសម្តេចព្រះនរោត្តមសីហនុ។
ព្រះអង្គបានរៀបអភិសេកជាមួយអ្នកម្នាង ជួនសាម៉ុន មានបុត្រ ៨អង្គ គឺបុត្រា ៦អង្គ និងបុត្រី ២អង្គ ៖
១. បុត្រា នរោត្តម សូរិយាវង្ស
២. បុត្រា នរោត្តម អទិច្ចវង្ស
៣. បុត្រី នរោត្តម បុប្ផានី
៤. បុត្រា នរោត្តម កន្តិម៉ា
៥. បុត្រា នរោត្តម ម៉ុនដារ៉ា
៦. បុត្រា នរោត្តម សិង្ហារ័ត្ន
៧. បុត្រា នរោត្តម ដារ៉ារ៉េត
៨. បុត្រី នរោត្តម សុភៈនារី។
ក្រៅអំពីអ្នកម្នាង ជួនសាម៉ុន ទ្រង់ ន.កន្ដុល អាចមានអ្នកម្នាង ជាជយាផ្សេងទៀតផងដែរ តែមិនការបញ្ជាក់ណាមួយច្បាស់ការនោះទេ។
ក្រោយការសិក្សានៅភ្នំពេញ និងនៅព្រៃនគរ ព្រះអង្គបានចូលធ្វើការក្នុងរដ្ឋបាលសា ធារណៈ និងកាន់តំណែងជាអនុអភិបាលក្រុងភ្នំពេញ នាឆ្នាំ១៩៤៤ ។ ពីឆ្នាំ១៩៤៧ ដល់១៩៥២ ព្រះអង្គម្ចាស់បានទៅសិក្សានៅប្រទេសបារាំង និងទទួលបានសញ្ញាបត្រវិស្វករក្សេត្រសាស្ត្រ ពីសាកលវិទ្យាល័យ ណាន់ស៊ី។ បន្ទាប់ពីមាតុភូមិនិវត្តន៍ ព្រះអង្គម្ចាស់ត្រូវតែងតាំងជាលេខាទី១នៃស្ថានទូតកម្ពុជាប្រចាំនៅទីក្រុងវ៉ាស៊ិនតោន សហរដ្ឋអាមេរិកនិងក្រោយមកបានឡើងតំណែងជាអគ្គរាជទូតកម្ពុជាប្រចាំប្រទេស ជប៉ុន ព្រមទាំងជាសមាជិកនៃឧត្តមក្រុមប្រឹក្សាអាណាចក្រផងដែរ។ លោកជាទីប្រឹក្សាឈានមុខរបស់ព្រះបាទនរោត្តម សីហនុ។ព្រះអង្គក៏ធ្លាប់ធ្វើជារដ្ឋមន្ត្រីក្រសួងការបរទេសក្រោមរដ្ឋាភិបាលសង្គមរាស្ត្រនិយម ដែលដឹកនាំដោយបងប្អូនជីដូនមួយរបស់ព្រះអង្គគឺនរោត្តម សីហនុ ។ នៅអំឡុង រយៈពេលពីថ្ងៃទី ៦តុលា ១៩៦២ ដល់ថ្ងៃទី២៥ ខែតុលា ឆ្នាំ១៩៦៦ ព្រះអង្គ កាន់តំណែងជានាយករដ្ឋមន្រ្តីរបស់ព្រះរាជាណាចក្រកម្ពុជាទី១យូរជាងគេបំផុត ហើយជាលើកទីមួយដែលជានាយករដ្ឋមន្ត្រីបម្រើការលើសពី 2 ឆ្នាំ។ រដ្ឋាភិបាលរបស់ព្រះអង្គ ជារដ្ឋាភិបាលកម្ពុជាដែលមានសន្តិភាពបានយូរជាងគេគឺ៤ឆ្នាំ ធៀបនឹងមធ្យមជាតិ តិចជា១ឆ្នាំ នៃអំឡុងពេលរាជរដ្ឋាភិបាល ៣០ឆ្នាំ ចន្លោះពីឆ្នាំ១៩៤៥ ដល់ឆ្នាំ១៩៧៥។ ជាអ្នកនយោបាយខ្មែរ ក្នុងអំឡុង៤ឆ្នាំ ជានាយករដ្ឋមន្ត្រី ព្រះអង្គម្ចាស់ ក៏បានកាន់តំណែង ជារដ្ឋមន្រ្តីក្រសួងការបរទេសផង និងក្រសួងមហាផ្ទៃផងដែរ(កាន់តំណែង ៣)។ នៅឆ្នាំ១៩៦៣ ក្នុងឋានៈជានាយករដ្ឋមន្ត្រីនៃព្រះរាជាណាចក្រកម្ពុជា ព្រះអង្គម្ចាស់ បាន យាងជាព្រះរាជតំណាងឲ្យកម្ពុជា នៅក្នុងពិធីបុណ្យសពលោកប្រធានាធិបតី កែណ្ណ ឌី នៃសហរដ្ឋអាមេរិក។ នៅខែមេសា ឆ្នាំ១៩៦៦ ក្នុងនាមជារដ្ឋមន្រ្តី ក្រសួងការបរទេស ព្រះអង្គម្ចាស់ បានយកលិខិតមួយច្បាប់ទៅក្រុមប្រឹក្សាសន្តិសុខនៃអង្គការសហប្រជាជាតិ ដើម្បីប្តឹងប្រឆាំងនឹងការកាន់កាប់ប្រាសាទព្រះវិហារ ដោយពួកកងទ័ពថៃ។
ក្នុងរបបសាធារណៈរដ្ឋខ្មែរ របស់លោកឧត្តមសេនីយ៍លន់ នល់ ព្រះអង្គត្រូវបានគេចាប់ដាក់គុករួមជាមួយនឹងសមាជិករាជវង្សដទៃទៀត។ ព្រះអង្គ បានសុគតនៅអំឡុងឆ្នាំ១៩៧៦ ក្នុងរបបខ្មែរក្រហម។
នរោត្តម សុវណ្ណារិទ្ធ ព្រះនត្តារបស់ព្រះអង្គម្ចាស់ នរោត្តម កន្តុល
នរោត្តម សុវណ្ណតារា (ណេម វីរៈម៉ារ៉ា)ព្រះនត្តារបស់ព្រះអង្គម្ចាស់ នរោត្តម កន្តុល
.jpg)
