ធ្វើដំណើរពីក្រុងភ្នំពេញតាមផ្លូវជាតិលេខ ៦ ដល់ក្រុងសៀមរាប ពេលឆ្លងផុតស្ទឹង មើលមកខាងឆ្វេងដៃ យើងនឹងឃើញអគារពណ៌សមួយ អមដោយរបង ដើមឈើត្រឈឹងត្រឈៃ និងបរិវេណស្រស់ស្រាយ ដែលមានសួនច្បារធំនៅខាងមុខ នោះហើយជាព្រះរាជដំណាក់ ជាទីព្រះបរមរតនកោដ្ឋព្រះបាទ នរោត្តម សីហនុ និងព្រះរាជអគ្គមហេសីស្នាក់អាស្រ័យនៅ ពេលស្ដេចយាងមកកាន់ទីក្រុងសៀមរាប។ ព្រះរាជដំណាក់នេះ បានសាងសង់ឡើងក្នុងសម័យបារាំងដាក់អាណានិគមនៅកម្ពុជាអំឡុងឆ្នាំ ១៨៦៣ ដល់ឆ្នាំ១៩៥៣ នារជ្ជកាលព្រះបាទស៊ីសុវត្ថិ អំឡុងឆ្នាំ១៩០៤ ដល់ឆ្នាំ១៩២៧ ស្ថិតនៅខាងកើតដងស្ទឹងសៀមរាប ចំកណ្ដាលបេះដូង នៃក្រុងសៀមរាប។ ក្រោយមកបានប្ដូរទីតាំងទៅនៅជិតអាស្រមព្រះអង្គចេកព្រះអង្គចម ហើយទីធ្លាបរិវេណព្រះរាជដំណាក់ចាស់បានប្រែក្លាយជាទីវត្តអារាមព្រះពុទ្ធសាសនាវិញ គឺវត្តដំណាក់សព្វថ្ងៃ។ ជាអកុសលនៅក្នុងរបបខ្មែរក្រហម វត្តដំណាក់ ត្រូវបានកងទ័ពខ្មែរក្រហមប្រើប្រាស់ជាមូលដ្ឋានរបស់ពួកគេ។ បច្ចុប្បន្ន មិនត្រឹមតែជាទីអារាមរបស់ព្រះពុទ្ធសាសនាសម្រាប់ព្រះសង្ឃគង់នៅបដិបត្តិធម៌ និងសម្រាប់ពុទ្ធបរិស័ទធ្វើបុណ្យទានប៉ុណ្ណោះទេ តែវត្តនេះ ក៏ជាថ្នាលបណ្ដុះបណ្ដាលចំណេះវិជ្ជាដល់ព្រះសង្ឃផងដែរ ដោយសារតែនៅក្នុងវត្តមានពុទ្ធិកបឋមសិក្សាសម្រាប់ព្រះសង្ឃសិក្សារៀនសូត្រ ភាសាបាលី ភាសាសំស្ក្រឹត និងព្រះធម៌នានា។ លើសពីនេះ នៅក្នុងបរិវេណវត្តក៏មានសាលាបឋមសិក្សាសម្រាប់កុមារសិក្សារៀនសូត្រផងដែរ។ បន្ថែមពីលើនេះ ជារៀងរាល់ថ្ងៃ តែងតែមានជនានុជនជាច្រើន មកអានសៀវភៅ ឬធ្វើកិច្ចការសាលានៅទីនោះ ព្រោះវត្តមានបណ្ណាល័យមួយហៅថាបណ្ណាល័យខេមរៈសិក្សា សម្រាប់សាធារណជនចូលធ្វើការសិក្សាស្រាវជ្រាវឯកសារ និងអានសៀវភៅនានាយ៉ាងសំបូរបែប។ យប់ថ្ងៃទី ១២ ខែមីនា ឆ្នាំ២០១៣ វេលាម៉ោង ១០និង៥នាទី ព្រះរាជដំណាក់ក្រុងសៀមរាប ខេត្តសៀមរាប ក្បែរព្រះអង្គចេកព្រះអង្គចម ទទួលការឆាបឆេះបណ្តាលមកពីការឆ្លងចរន្តអគ្គិសនី (ទុស្សេខ្សែភ្លើង)។ ករណីនេះ នគរបាលពន្លត់ និងបង្ការអគ្គិភ័យបានប្រើប្រាស់រថយន្តពន្លត់អគ្គិ ភ័យជិត១០គ្រឿង។ រសៀលថ្ងៃទី១៣ ខែមីនា ឆ្នាំ២០២៣ សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង ជាតំណាងដ៏ខ្ពងខ្ពស់បំផុតរបស់សម្តេចព្រះមហាក្សត្រី ព្រះវររាជមាតាជាតិខ្មែរ នៃព្រះរាជាណាចក្រកម្ពុជា បានអញ្ជើញជាអធិបតីក្នុងពិធីបួងសួងក្រុងពលីសុំរុះរើ និង ជួសជុលព្រះរាជដំណាក់ទាំងស្រុង។
